Sloka Text in Telugu , Kannada, Gujarati, Devanagari, English

हरिः ओम्

સુન્દરકાણ્ડ્.
અથ ષોડશસ્સર્ગઃ

પ્રશસ્ય તુ પ્રશસ્તવ્યાં સીતાં તાં હરિપુંગવ|
ગુણાભિરામં રામં ચ પુનઃ ચિંતાપરોઽભવત્ ||1||

સ મુહૂર્તમિવ ધ્યાત્વા ભાષ્પપર્યાકુલેક્ષણઃ|
સીતા માશ્રિત્ય તેજસ્વી હનુમાન્વિલલાપ હ||2||

માન્યા ગુરુવીનીતસ્ય લક્ષ્મણસ્ય ગુરુપ્રિયા|
યદિ સીતાઽપિ દુઃખાર્તો કાલોહિ દુરતતિક્રમઃ||3||

રામસ્ય વ્યવસાયજ્ઞા લક્ષ્મણસ્ય ચ ધીમતઃ |
નાત્યર્થં ક્ષુભ્યતે દેવી ગઙ્ગેવ જલદાગમે||4||

તુલ્યશીલવયોવૃત્તાં તુલ્યાભિજનલક્ષણામ્|
રાઘવોઽર્હતિ વૈદેહીં તં ચેયમસિતેક્ષણા||5||

'તાં દૃષ્ટ્વા નવહેમાભાં લોકકાન્તામિવ શ્રિયમ્|
જગામ મનસા રામં વચનં ચ ઇદમબ્રવીત્||6||

અસ્યા હેતોર્વિશાલાક્ષ્યા હતો વાલી મહાબલઃ|
રાવણ પ્રતિમો વીર્યે કબન્ધશ્ચ નિપાતિતઃ||7||

વિરાધશ્ચ હત સ્સંખ્યે રાક્ષસો ભીમવિક્રમઃ|
વને રામેણ વિક્રમ્ય મહેન્દ્રેણેવ શમ્બરઃ||8||

ચતુર્દશ સહસ્રાણિ રક્ષસાં ભીમકર્મણામ્|
નિહતાનિ જનસ્થાને શરૈ રગ્નિશિખોપમૈઃ||9||

ખરશ્ચ નિહત સ્સંખ્યે ત્રિશિરાશ્ચ નિપાતિતઃ|
દૂષણશ્ચ મહાતેજા રામેણ વિદિતાત્મના||10||
]
ઐશ્વર્યં વાનરાણાં ચ દુર્લભં વાલિપાલિતમ્|
અસ્યા નિમિત્તે સુગ્રીવઃ પ્રાપ્તવાન્ લોક સત્કૃતમ્||11||

સાગરશ્ચ મયા ક્રાંતઃ શ્રીમાન્ નદનદી પતિઃ |
અસ્યાહેતોર્વિશાલાક્ષ્યાઃ પુરી ચેયં નિરીક્ષિતા||12||

યદિ રામઃ સમુદ્રાન્તાં મેદિનીં પરિવર્તયેત્ |
અસ્યાઃ કૃતે જગત્ ચાપિ યુક્તં ઇત્યેવ મે મતિઃ||13||

રાજ્યં વા ત્રિષુ લોકેષુ સીતા વા જનકાત્મજા|
ત્રૈલોક્ય રાજ્યં સકલં સીતાયા નાપ્નુયત્કલામ્||14||

ઇયં સા ધર્મશીલસ્ય મૈથિલસ્ય મહાત્મનઃ|
સુતા જનકરાજસ્ય સીતા ભર્તૃદૃઢવ્રતા ||15||

ઉત્થિતા મેદિનીં ભિત્વા ક્ષેત્રે હલમુખક્ષતે |
પદ્મરેણુનિભૈઃ કીર્ણા શુભૈઃ કેદારપાંસુભિઃ||16||

વિક્રાન્તસ્યાર્ય શીલસ્ય સંયુગે ષ્વનિવર્તિનઃ|
સ્નુષા દશરથસ્યૈષા જ્યેષ્ઠા રાજ્ઞો યશસ્વિની||17||

ધર્મજ્ઞસ્ય કૃતજ્ઞસ્ય રામસ્ય વિદિતાત્મનઃ|
ઇયં સા દયિતા ભાર્યા રાક્ષસીવશમાગતા||18||

સર્વાન્ભોગાન્ પરિત્યજ્ય ભર્તૃ સ્નેહબલાત્કૃતા|
અચિન્તયિત્વા દુઃખાનિ પ્રવિષ્ઠા નિર્જનં વનમ્||19||

સંતુષ્ટા ફલમૂલેન ભર્તૃ શુશ્રૂષણે રતા|
યા પરાં ભજતે પ્રીતિં વનેઽપિ ભવને યથા||20||

સેયં કનકવર્ણાઙ્ગી નિત્યં સુસ્મિત ભાષિણી|
સહતે યાતનામેતાં અનર્થાનાં અભાગિની||21||

ઇમાં તુ શીલસંપન્નાં દ્રષ્ટુમર્હતિ રાઘવઃ|
રાવણેન પ્રમથિતાં પ્રપામિવ પિપાસિતઃ||22||

અસ્યાનૂનં પુનર્લાભાત્ રાઘવઃ પ્રીતિમેષ્યતિ|
રાજા રાજ્યપરિભ્રષ્ટઃ પુનઃ પ્રાપ્યેવ મેદિનીમ્||23||

કામભોગૈઃ પરિત્યક્તા હીના બન્ધુજનેન ચ|
ધારયત્યાત્મનો દેહં તત્ સમાગમકાક્ષિણી||24||

નૈષા પશ્યતિ રાક્ષસ્યો નેમાન્ પુષ્પફલદ્રુમાન્|
એકસ્થ હૃદયા નૂનં રામમેવાનુપશ્યતિ||25||

ભર્તા નામ પરં નાર્યા ભૂષણં ભૂષણાદપિ|
એષાતુ રહિતા તેન ભૂષણાર્હા નશોભતે ||26||

દુષ્કરં કુરુતે રામો હીનો યદનયા પ્રભુઃ|
ધારયત્યાત્મનો દેહં ન દુઃખે નાવસીદતિ||27||

ઇમાં અસિતકેશાન્તાં શતપત્ર નિભેક્ષણા|
સુખાર્હાં દુઃખિતાં દૃષ્ટ્વા મમાપિ વ્યથિતં મનઃ||28||

ક્ષિતિક્ષમા પુષ્કરસન્નિભાક્ષી
યા રક્ષિતારાઘવ લક્ષ્મણાભ્યામ્|
સા રાક્ષસીભિ ર્વિકૃતેક્ષણાભિઃ
સંરક્ષ્યતે સંપ્રતિ વૃક્ષમૂલે||29||

હિમહતનળિનીવ નષ્ટશોભા
વ્યસન પરમ્પરયા નિપીડ્યમાના|
સહ ચર રહિતેવ ચક્રવાકી
જનકસુતા કૃપણાં દશાં પ્રપન્ના||30||

અસ્યા હિ પુષ્પાવનતાગ્ર શાખાઃ
શોકં દૃઢં વૈ જનયન્ત્યશોકાઃ|
હિમવ્યપાયેન ચ શીતરશ્મિઃ
અભ્યુત્થિતો નૈક સહસ્ર રશ્મિઃ||31||

ઇત્યેવ મર્થં કપિરન્વવેક્ષ્ય
સીતેય મિત્યેવ વિનિષ્ટ બુદ્ધિઃ|
સંશ્રિત્ય તસ્મિન્ નિષસાદ વૃક્ષે
બલી હરીણાં વૃષભસ્તરસ્વી||32||

ઇત્યાર્ષે શ્રીમદ્રામાયણે આદિકાવ્યે વાલ્મીકીયે
ચતુર્વિંશત્ સહસ્રિકાયાં સંહિતાયામ્
શ્રીમત્સુન્દરકાણ્ડે ષોડશસ્સર્ગઃ||

||ōm tat sat||